सातारा प्रतिनिधी | कोरेगाव- सातारा रस्त्यावर त्रिपुटी खिंडीजवळ अपघाताची घटना घडली असून यामध्ये दोघांचा मृत्यू झाला आहे. त्रिपुटी खिंडीत दुकाचीला अज्ञात वाहनाने धडक दिली. यात दुचाकीवरील दोन जण ठार झाले. राहुल अंकुश जाधव (रा. ल्हासुर्णे) असे एका मृताचे नाव असून, दुसऱ्याचे नाव रात्री उशिरापर्यंत समजू शकले नाही. आज सायंकाळी सातच्या सुमारास हा अपघात झाला.
खिंडीच्या अलीकडे पहिल्या वळणावर असता दुचाकीला अज्ञात वाहनाने जोरदार ठोकर दिली. यात दुचाकीवरील दोघेही रस्त्यावर गंभीर जखमी अवस्थेत पडले. काही वाहनचालकांनी त्या दोघांना उचलले असता त्यातील एक जण जागीच ठार झाल्याचे दिसून आल्याने त्याचा मृतदेह कोरेगाव येथील ग्रामीण रुग्णालयाकडे पाठवण्यात आला. तेथे त्यांचे नाव राहुल अंकुश जाधव (वय ३८, रा. ल्हासुर्णे, ता. कोरेगाव) असल्याचे स्पष्ट झाले. दुसऱ्या सुमारे ४० वर्षे वयाच्या गंभीर जखमीला १०८ रुग्णवाहिकेतून साताऱ्यातील सर्वसाधारण रुग्णालयात उपचारासाठी पाठवले गेले. मात्र, त्यांचीही उपचारापूर्वी मृत्यू झाला. मात्र त्यांचे नाव, गाव समजू शकले नाही.
दरम्यान, घटनास्थळी कोरेगाव पोलिस ठाण्यातील सहायक पोलिस निरीक्षक गणेश माने व त्यांचे सहकारी दाखल झाले असून, गुन्हा दाखल करण्याची प्रक्रिया रात्री उशिरापर्यंत सुरू होती, तसेच दुसऱ्या मृताची ओळख पटविण्याचे कामही सुरू होते.