पाटण प्रतिनिधी । नवीन महाबळेश्वर प्रकल्पासंदर्भात पाटण तालुक्यातील स्थानिकांच्या हरकती, तक्रारी, आक्षेप व मागण्यासंदर्भात नुकतीच बैठक घेण्यात आली. या बैठकीस जिल्हा बँकेचे संचालक सत्यजितसिंह पाटणकर यांनी उपस्थित राहत स्थानिक जनतेच्या मागण्या व हरकतींचे निवेदन प्रकल्पाच्या वरिष्ठ अधिकाऱ्यांना दिले. “नवीन महाबळेश्वर प्रकल्प हा सार्वत्रिक हिताचा असला तरी त्यात मूळच्या स्थानिक खासगी जमीनधारकांना याचा नक्की कसा आणि किती फायदा होणार?, याची स्पष्टता गरजेचे आहे. खासगी जागांवर परस्पर लावलेले आरक्षण हे अन्यायकारक असून, याबाबत शासनाने आपली भूमिका स्पष्ट करावे. कोयनेतील बंद बोटिंग, पर्यटनाची मूलभूत माध्यमे तातडीने सुरू करावीत, अशा मागण्यांसह या प्रकल्पासंदर्भात हरकती, आक्षेप पाटणकर यांनी एका निवेदनाद्वारे घेतला आहे.
सत्यजित पाटणकर यांनी दिलेल्या निवेदनात म्हटले आहे की, नवीन महाबळेश्वर प्रकल्पात तालुक्यातील ज्या गावांचा समावेश करण्यात आलेला आहे, त्या-त्या गावांतील खासगी जमिनीवर पर्यटनवाढीच्या अनुषंगाने शासनाने वेगवेगळ्या प्रकारचे आरक्षण टाकले आहे. यासंदर्भात संबंधित जमीन मालकांना कोणतीही माहिती दिलेली नाही. संबंधित जमिनींच्या बदल्यात शासनाकडून नक्की कशाप्रकारे व किती मोबदला मिळणार, हेही जाहीर करावे.
या जमिनींवर स्थानिक जमीन मालकांना वेगळा प्रकल्प अथवा काही गोष्टी करायच्या असतील तर त्यांचे अधिकार अबाधित ठेवावेत. त्यामुळे विनापरवाना परस्पर टाकलेले हे आरक्षण स्थानिकांना अमान्यच आहे. जे आरक्षण परस्पर टाकले आहे, ते बदलण्यासाठी करावी लागणारी प्रक्रिया याबाबतही प्रशासनाकडून सविस्तर खुलासा होणे गरजेचे असल्याचे पाटणकर यांनी म्हटले आहे.
