सातारा प्रतिनिधी । सर्वत्र उद्या आठ मार्च हा जागतिक महिला दिन म्हणून साजरा केला जाणार आहे. या महिला दिनाचे औचित्य साधून सर्वत्र अनेक उपक्रम आयोजित केले जातात. सातारा जिल्ह्यात देखील जिल्हा परिषदेच्या वतीने यंदाच्या वर्षीपासून जिल्ह्यातील १ हजार ४९२ ग्रामपंचायतीमध्ये विशेष महिला सभेचे आयोजन करण्याचा निर्णय घेतला आहे. उद्या विशेष सभेत पाणी आणि स्वच्छतेसाठी काम करणाऱ्या महिलांचा सन्मान केला जाणार असून ग्रामपंचायतीमध्ये ‘विशेष स्वच्छता धाव’चेही आयोजन करण्यात आलेले आहे.
सातारा जिल्ह्यात जिल्हा परिषदेच्या पाणी व स्वच्छता विभागाच्या वतीने जागतिक महिला दिनाच्या निमित्ताने विविध कार्यक्रमांचे आयोजन करण्यात आलेले आहे. या अनुषंगाने जिल्हास्तर, तालुका आणि गावस्तरावर हे कार्यक्रम होत आहेत. तर पाणी व स्वच्छता संबंधित उत्कृष्ट आणि आदर्श काम करणाऱ्या महिलांना सन्मानित करण्यात येणार आहे. यामधून महिलांना प्रोत्साहित केले जाईल. त्यामुळे यातून इतर महिलांनाही प्रेरणा मिळणार आहे.
या अनोख्या उपक्रमाबरोबरच जिल्ह्यातील तालुकास्तरावर ‘हर घर जल’ घोषित गावांना राज्याच्या पाणीपुरवठा व स्वच्छता विभागाच्या स्वाक्षरीचे प्रमाणपत्र आणि सन्मानपत्र देण्यात येणार आहे. यासाठीच जिल्ह्यातील प्रत्येक ग्रामपंचायतील सभा होणार आहे. यानिमित्ताने सर्व ग्रामपंचायतींमध्ये महिलांची ‘विशेष स्वच्छता धाव’ आयोजित करण्यात येणार आहे. यामध्ये महिला, किशोरवयीन मुली, विद्यार्थिनी, स्वच्छता कर्मचारी, ग्रामपंचायत सदस्य आणि प्रभावशाली लोकांचा समावेश करून पाणी, स्वच्छता व आरोग्य संबंधित संदेशाद्वारे जनजागृती करण्यात येणार आहे.
