कराड प्रतिनिधी | ड्रग्जचे मोठे रॅकेट कराड पोलिसांच्या हाती लागले असल्यामुळे पोलिसांनी या प्रकरणी धडक कारवाईची मोहीम राबविली आहे. ड्रग्जच्या तस्करीप्रकरणी पोलिसांनी दोन परदेशी नागरिकांसह आणखी नऊजणांना अटक केली आहे. कराडच्या संयुक्त पोलिस पथकाने मुंबईत ही कारवाई केली असून अटक करण्यात आलेल्या नऊ संशयितांना न्यायालयात हजर करण्यात आले असता त्यांना आज सोमवारपर्यंत पोलिस कोठडी सुनावण्यात आली आहे. या संशयितांकडून पोलिसांनी आणखी २० ग्रॅम ड्रग्ज हस्तगत केले आहे.
अमित अशोक घरत (वय ३१, रा. करांजडे, ता. पनवेल, जि. रायगड), दीपक सुभाष सूर्यवंशी (४३, रा. चाळीसगाव, जि. जळगाव, सध्या रा. तुर्भे, मुंबई), बेंजामिन अॅना कोरू (४४, रा. कोपरखैरणे नवी मुंबई), रोहित प्रफुल्ल शहा (३१, रा. शनिवार पेठ, माळी कॉलनी, कराड), सागना इ मॅन्युअल (३९, रा. घणसोली, नवी मुंबई), नयन दिलीप मागाडे (२८, रा. डोंबिवली पूर्व, जि. ठाणे), प्रसाद सुनील देवरुखकर (३०, रा. पावस्कर गल्ली, कराड), संतोष अशोक दोडमणी (२२, रा. सैदापूर, ता, कराड), फैज दिलावर मोमीन (२६, रा. मार्केट यार्ड, कराड) अशी अटक केलेल्यांची नावे आहेत.
यापूर्वी या प्रकरणात पोलिसांनी तिघांना अटक केली असून, अटकेत असलेल्या एकूण संशयितांची संख्या आता बारा झाली आहे. संशयितांकडून आतापर्यंत सुमारे ३० ग्रॅम वजनाचे एमडी ड्रग्ज ताब्यात घेण्यात आले आहे. यापूर्वी पोलिसांनी राहुल अरुण बडे (वय ३७, रा. पाण्याच्या टाकीजवळ, सोमवार पेठ, कराड), समीर ऊर्फ सॅम जावेद शेख (२४, रा. आदर्श कॉलनी, कार्वे नाका, कराड), तौसिब चाँदसो बारगीर (२७, रा. अष्टविनायक मंगल कार्यालया नजीक, कार्वेनाका, कराड) या तिघांना पोलिसांनी अटक केली आहे.
