सातारा प्रतिनिधी | सातारा जिल्ह्यात मान्सून सक्रिय झाला असून शनिवारी साताऱ्यासह पश्चिम भागात अनेक ठिकाणी धुवाॅंधार पाऊस कोसळला. तर पूर्व दुष्काळी भागातही पावसाने दमदार हजेरी लावली. या पावसामुळे बळीराजांत आनंदाचे वातावरण निर्माण झाले. शनिवारी झालेल्या पावसाने जिल्ह्यात कोरेगाव, कराड तालुक्यात देखील पिकांचे व दुकानांचे नुकसान झाले. कोरेगाव तर दुकानावरील पत्रे भिंग्रीसारखे उडून गेले. तर वादळी वाऱ्यामुळे ऊस भुईसपाट झाले. दुकानातील गाळ्यामध्ये पाणी जाऊन मालाचेही नुकसान झाले.
सातारा जिल्ह्यात मागील दोन वर्षांत मान्सूनचा पाऊस १० जूननंतर दाखल झाला. त्यानंतरही पावसाने ओढ दिली होती.त्यामुळे पेरण्यांना उशीर झाला होता. यंदा मात्र मान्सून वेळेवर दाखल झाला आहे. जिल्ह्यात गुरूवारपासूनच पाऊस पडू लागलाय. पश्चिम भागातील कास, बामणोली, तापोळा, महाबळेश्वर, कोयना, नवजा या भागातचांगला होत आहे. तसेच पूर्व भागातील माण, खटाव, फलटण तालुक्यांतीलही अनेक गावांत पावसाने दमदारहजेरी लावली आहे.
शुक्रवारी रात्री तर सातारा शहरात विजांच्या कडकडाटात पाऊस पडला. यामुळे नागरिकांना घराबाहेर पडणेही मुश्कील झाले होते. त्यातच शहराच्या अनेक भागातील वीजपुरवठाही खंडितझाला होता.तर शनिवारी दुपारच्या सुमारासही सातारा शहरासह परिसरात पावसाने जोरदार हजेरी लावली. सुमारे दीडतास पाऊस कोसळत होता. दुपारी साडे तीनच्या सुमारास पाऊस थांबला. पण, त्यानंतरही आभाळ भरुनआले आणि सायंकाळी साडे पाच वाजल्यापासून पुन्हा पावसाला सुरूवात झाली.
कोरेगाव वादळी वाऱ्यासह पावसाची हजेरी
कोरेगाव शहरासह तालुक्याला शनिवारी सायंकाळी पावणे पाचच्या सुमारास पावसाने झोडपून काढलं आहे. सोसाट्याच्या वाऱ्यामुळे मोठ्या इमारतीच्या टेरेसवर पत्र्याचे शेड भिंगऱ्याप्रमाणे उड़ून सातारा – लातूर राष्ट्रीय महामार्गावर आझाद चौकात येऊन पडले. शहरातील बहुतांश घरावरील पत्रे उडाले असून रस्त्यावर उभारलेले फ्लेक्सही वाऱ्याने उडून गेले.
कोयना, नवजाला आतापर्यंत 37 मिलिमीटर पाऊस
जिल्ह्याच्या पश्चिम भागात पाऊस सुरूच आहे. शनिवारी सकाळपर्यंतच्या २४ तासांत कोयनानगरला १२ आणि नवजा येथे २१ मिलिमीटर पर्जन्यमानाची नोंद झाली आहे. तर महाबळेश्वरला पाऊस झाला नाही. तर १ जूनपासून आतापर्यंत कोयना आणि नवजा येथे प्रत्येकी ३७ आणि महाबळेश्वरला १२ मिलिमीटर पर्जन्यमान झाले आहे. इतर भागातही पाऊस झाला आहे.
माणमध्ये दमदार पाऊस
पावसामुळे शहरातील गटारीभरुन वाहिली. तसेच सर्व रस्त्यावर पाणीच पाणी दिसत होते. सखल भागातही पाणी साचून राहिले.पूर्व भागातील माण, खटाव, फलटण या भागात चांगला पाऊस झाला. माणमधील वरकुटे मलवडी, शेनवडी,कुरणवाडी, काळचाैंडी परिसरात दमदार पाऊस पडला. यामुळे काही ठिकाणी ओढ्याला पाणी आले. तसेच जमिनीतही पाणी साचून राहिले. हा पाऊस खरीप हंगामातील पेरणी करण्यासाठी उपयुक्त असल्याचे सांगण्यात येत आहे. तसेच तालुक्यातीलच मार्डी, पळशी, मोही परिसरातही पावसाने चांगलेच झोडपले.तासभर झालेल्या पावसामुळे शेतात पाणी साचले होते.
फलटण तालुक्यातील पुलावरून पाणी
फलटण तालुक्यातील आदर्की परिसरात सलग तीन दिवसांपासून पाऊस पडत आहे. शनिवारच्या पावसामुळे आदर्की, हिंगणगाव ओढ्याला पूर आला होता. सावतानगर आणि पठाण वस्तीकडे जाणाऱ्या पुलावरून पाणी वाहिल्यामुळे काहीवेळ वाहतूक विस्कळीत झाली होती.
खंबाटकी घाटात वाहतूक धिम्या गतीने
खंडाळा तालुक्यातही पाऊस झाला. खंबाटकी घाट आणि परिसरात पावसाच्या जोरदार सरी कोसळल्याने सर्वत्र पाणीच पाणी झाले. तर पावसामुळे समोरील काहीच दिसत नसल्याने महामार्गावरील वाहतूक मंदावली होती.