कराड प्रतिनिधी | कराड येथील ईदगाह मैदानावर गप्पा मारत बसलेल्या एका तरुणावर पाच जणांकडून जीवघेणा हल्ला केल्याची घटना घडली आहे. या ठिकाणी स्कॉर्पिओ गाडीतून येत पाच जणांनी चाकूसह कोयत्याने हल्ला केला असून या हल्ल्यात संबंधित युवक गंभीर जखमी झाला असून त्याच्यावर रुग्णालयात उपचार सुरू आहेत. याप्रकरणी पोलिसांनी पाच जणांवर गुन्हा दाखल करत सर्व आरोपींना अटक केली आहे.
शुभम कट्टीमनी असे हल्ला झालेल्या तरुणाचे नाव आहे. दिनांक २९ मार्च रोजी शुभम कराड येथील ईदगाह मैदानात आपल्या काही मित्रांसोबत गप्पा मारत बसला होता. याठिकाणी सायंकाळी ७ वाजण्याच्या सुमारास स्कॉर्पिओ गाडीतून पाच जण आले. त्यांनी गप्पा मारत बसलेल्या शुभम याला शिवीगाळ करण्यास सुरुवात केली. यावेळी शुभमने त्यांना समजवण्याचा प्रयत्न केला मात्र, त्या पाच जणांनी शुभमल मारहाण करत त्याच्यावर हल्ला केला. यावेळी झटापटीत त्यांनी शुभमवर चाकू आणि कोयत्याने वार केले.
जीवघेण्या हल्ल्यानंतर घटनास्थळी उपस्थित असलेल्या शुभमच्या मित्रांनी त्याला तातडीने खासगी रुग्णालयात उपचारासाठी दाखल केले. त्याच्यावर कृष्णा हॉस्पिटल येथे उपचार सुरू आहेत. दरम्यान, पोलिसांनी आरोपींवर खूनाच्या प्रयत्नासह जीवे मारण्याची धमकी दिल्याच्या कारणावरून गुन्हा दाखल करत अटक केली आहे. या हल्ल्याच्या प्रकरणात एक अल्पवयीन मुलासह पाच जणांचा समावेश आहे. कराड शहर पोलिसांकडून घटनेचा अधिक तपास केला जात आहे.
