सातारा प्रतिनिधी | पुणे-बंगळूरू राष्ट्रीय महामार्गावर सातारा तालुक्यातील शेंद्रे येथे पाच वाहनांचा विचित्र अपघात झाल्याची घटना आज गुरुवारी सकाळी घडली. यामध्ये कारमधील एका महिलेचा जागीच मृत्यू झाला. मृत महिला पिंपरी चिंचवड येथील रहिवासी आहे.
याबाबत पोलिसांनी दिलेली माहिती अशी की, पुण्यातील पिंपरी चिंचवड येथील साशीमकुमार देवगरिया (वय ३५) हे पत्नी पारूमिता देवगरिया (३०) समवेत कारमधून बंगळूरू येथे राहात असलेल्या आपल्या भावाकडे निघाले होते. शेंद्रेजवळ पोहोचल्यानंतर पाठीमागून त्यांच्या कारला अज्ञात वाहनाने जोरदार धडक दिली. त्यामुळे त्यांच्या कारने चार पलट्या घेतल्यानंतर कार दुभाजकावर धडकली.
हा अपघात एवढा भीषण होता की, कारचे इंजिन तुटून रस्त्यावर फेकले गेले. याचवेळी पाठीमागून आलेला एका कंटेनर चालकाचे नियंत्रण सुटल्याने कंटनेर दुभाजकावर जाऊन धडकला. अशा प्रकारे अन्य तीन टेम्पोही एकमेकांना धडकले. मात्र, त्यामध्ये कोणी जखमी झाले नाही. केवळ कारमधील चालक साशीमकुमार हे जखमी झाले. तर त्यांची पत्नी पारूमिता ही जागीच ठार झाली. या अपघातानंतर महामार्गावर काही वेळ वाहतूक ठप्प झाली होती. मात्र, बोरगाव पोलिसांनी तातडीने घटनास्थळी धाव घेऊन वाहतूक पूर्ववत केली.
