सातारा प्रतिनिधी । सातारा जिल्ह्याच्या पश्चिम भागातील कोयना पाणलोट क्षेत्रात पावसाचा जोर कमी झाला आहे. तरीही धरणात पाणी आवक असल्याने पाणीसाठा 72.51 टीएमसी इतका झाला आहे. त्यामुळे धरणाच्या दरवाजाला कोणत्याही क्षणी पाणी लागल्यास तसेच पावसाचा जोर वाढल्यास धरणातून दरवाजा उघडून विसर्गही करावा लागणार आहे.
सध्या पायथा वीजगृहातूनच २ हजार १०० क्यूसेक विसर्गच सुरू आहे. जून महिन्याच्या मध्यावर जिल्ह्यात पाऊस सुरू झाला. त्यानंतर मागील तीन आठवड्यांहून अधिक काळ पश्चिम भागाला पावसाने झोडपून काढले. त्यामुळे सर्वत्र पाणीच पाणी दिसत आहे. तसेच पश्चिम भागातील प्रमुख धरणक्षेत्रातही पावसाची संततधार होती. यामुळे लवकरच धरणांत मोठ्या प्रमाणात पाणीसाठा वाढला. सध्यस्थितीत प्रमुख सहा धरणांत ५० ते ७५ टक्क्यांदरम्यान म्हणजे १०३ टीएमसी साठा निर्माण झाला आहे. सध्या पावसाचा जोर कमी झाला असलातरी धरणांत पाण्याची आवक होतच आहे. त्यामुळे धरणांची पाणीपातळीही वाढत चालली आहे.
शुक्रवारी सकाळी आठ वाजेपर्यत कोयनानगर येथे 08, नवजा 21 आणि महाबळेश्वरला 21 मिलिमीटर पावसाची नोंद झालेली आहे. तर एक जूनपासून आतापर्यंत कोयनानगर येथे २ हजार १५५, नवजा १ हजार ९४८ आणि महाबळेश्वरला २ हजार १३ मिलिमीटर पाऊस पडला आहे. कोयना धरण पाणलोट क्षेत्रात पावसाचा जोर कमी असला तरी आवक कायम आहे. शुक्रवारी सकाळच्या सुमारास धरणात ८ हजार ९५९ क्यूसेक वेगाने पाणी येत होते. तर धरणातील पाणीसाठा 72.51 टीएमसी झालेला. त्यामुळे आता धरणातील पाणी दरवाजाला स्पर्श करणार आहे. कारण, ७३ टीएमसीला कोयनेतील पाणी दरवाजाला लागण्यास सुरूवात होते. परिणामी पावसाचा जोर वाढल्यास धरणातून लवकरच विसर्ग करावा लागणार आहे.
Koyna Dam
Date: 11/07/2025, 8:00 AM
Water level: 2132’09”
(650.062m)
Gross Storage: 72.51 TMC (68.89%)
Inflow : 8,959 Cusecs.
(0.77 TMC)
Discharges-
KDPH : 2100 Cusecs.
Rainfall in mm-
(Daily/Cumulative)
Koyna- 08/2155
Navaja- 21/1948
Mahabaleshwar- 16/2013
