सातारा प्रतिनिधी । शेतकऱ्यांच्या नावावर शेतजमीन असेल तर त्यांना फार्मर आयडी अर्थात शेतकरी ओळख क्रमांक दिला जात आहे. आयडीमुळे शेतकऱ्यांना कृषीविषयक सेवा, सुविधा तसेच शासकीय योजनांचे लाभ पारदर्शकपणे मिळू शकतील. त्यासाठी ‘अॅग्रिस्टॅक’ नावाने डिजिटल प्लॅटफॉर्म तयार करण्यात आला आहे. अॅग्रीस्टॅक उपक्रमांतर्गत शेतकरी ओळख क्रमांक निर्माण करण्यात येणार आहे. कृषी विभागाकडील योजनेच्या लाभासाठी हा ओळख क्रमांक बंधनकारक राहणार आहे. त्यामुळे शेतकऱ्यांनी ओळख क्रमांक निर्माण करण्यासाठी गावपातळीवरील शिबिरात सहभागी व्हावे, असे आवाहन जिल्हा अधीक्षक कृषी अधिकारी भाग्यश्री फरांदे यांनी केले आहे.
भाग्यश्री फरांदे यांनी प्रसिद्धीस दिलेल्या पत्रकात म्हटले आहे की, राज्यात शेतकऱ्यांसाठी अॅग्रीस्टॅक संकल्पना राबविण्यास मान्यता देण्यात आलेली आहे. अॅग्रिस्टॅक हे कृषी क्षेत्रात डेटा व डिजिटल सेवा वापरून शासनाच्या विविध योजनांचा लाभ पात्र शेतकऱ्यांपर्यंत जलदगतीने आणि परिणाम कारकरीत्या पोहोचण्यासाठी स्थापित केले जाणारे डिजिटल फाउंडेशन आहे.
अॅग्रिस्टॅक प्रकल्पात प्रत्येक सातबाराधारक शेतकऱ्याला युनिक फार्मर आयडी दिला जात आहे. शेतकरी ओळख क्रमांक तयार करण्यासाठी कॅम्पमध्ये शेतकऱ्यांचा आधार क्रमांक त्यांच्या खाते उताऱ्याला जोडण्यात आला आहे. त्यासाठी शेतकऱ्यांचा मोबाइल क्रमांक आधारशी संलग्न असणे आवश्यक आहे. ज्यांच्या नावे सात-बारा नोंद आहे, अशा सर्व शेतकऱ्यांना अॅग्रिस्टॅक क्रमांक अनिवार्य आहे.
कृषी क्षेत्रासाठी सर्वसमावेशक डिजिटल पायाभूत सुविधा निर्माण करणे अॅग्रिस्टॅक उपक्रमाचा उद्देश आहे. प्रकल्पामुळे माहिती आधारित योग्य निर्णय घेणे, गरजू शेतकऱ्यांना योग्यवेळी सेवा प्रदान करणे, कृषी उपक्रमांची कार्यक्षमता सुधारणे शक्य होणार आहे. अधिक माहितीसाठी गावातील ग्राम महसूल अधिकारी, कृषी सहायक किंवा ग्रामपंचायत अधिकाऱ्यांशी संपर्क साधावा, असे आवाहनही करण्यात आले आहे. या योजनेचा लाभ घेतल्यास शेतकऱ्यांना फायदा होणार आहे. त्यामुळे जिल्ह्यातील शेतकऱ्यांनी या योजनेचा लाभ घ्यावा, असे आवाहन जिल्हा कृषी विभागाच्या अधिकाऱ्यांनी प्रसिद्धी पत्रकाद्वारे केले आहे.
अॅग्रिस्टॅक योजनेचे अपेक्षित फायदे…
- – पंतप्रधान शेतकरी सन्मान योजनेतील आवश्यक अटी पूर्ण करून शेतकऱ्यास लाभ प्राप्त करण्यामध्ये सुलभता.
- – योजनेंतर्गत पात्र सर्व लाभार्थीचा समावेश.
- – पीक कर्जासाठी किसान क्रेडिट 3 कार्ड आणि कृषी इन्फ्रास्ट्रक्चर फंड व इतर कृषी कर्ज उपलब्धतेसाठी सुलभता.
- – पीक विमा, तसेच आपत्ती 3 व्यवस्थापनांतर्गत नुकसानभरपाईसाठी सर्वेक्षणामध्ये प्रवेशयोग्यता.
- – किमान आधारभूत किमतीवर खरेदीमध्ये शेतकऱ्यांचे नोंदणीकरण ऑनलाइन पद्धतीने होणार.
फार्मर आयडीसाठी आवश्यक कागदपत्रे
शेतकऱ्यांना पिकासाठी कर्ज मिळवण्यासाठी किसान क्रेडिट कार्ड, कृषी इन्फ्रास्ट्रक्चर फंड व शेतीच्या विकासासाठी इतर कर्ज उपलब्ध करून घेण्यास सुलभता येईल. पीक विमा तसेच आपत्ती व्यवस्थापन अंतर्गत शेतकऱ्यांना नुकसान भरपाईसाठी शेतकऱ्यांचे सर्वेक्षण करण्यात सुलभता येईल, किमान आधारभूत किमतीवर खरेदीमध्ये शेतकऱ्यांची नोंदणी करणे ऑनलाइन पद्धतीने होऊ शकेल, यासाठी शेतकऱ्यांसाठी कृषी कर्ज, निविष्ठा आणि इतर सेवा देणाऱ्या यंत्रणांना कृषी सेवा सहजपणे उपलब्ध होईल.
