सातारा प्रतिनिधी | भाजप आमदार जयकुमार गोरे यांच्या ताफ्यातील भरधाव वाहनाने दुचाकीला उडवल्याने दोनजण ठार झाल्याची दुर्दैवी घटना आज घडली. भाजप आमदार गोरे जनसंवाद दौऱ्यासाठी बोराटवाडी येथील आपल्या निवासस्थानातून बाहेर पडले. ही सर्व वाहने भरधाव वेगात निघाली असताना बिदाल व दहिवडी दरम्यान असलेल्या शेरेवाडी दरम्यान भीषण अपघात झाला.
अनिकेत नितीन मगर (वय : २६ वर्षे) व रणजीत राजेंद्र मगर (वय : ३२ वर्षे) अशी अपघातात मृत्यू झालेल्यांची नावे आहेत. याबाबत अधिक माहिती अशी की, आज भाजप आ. जयकुमार गोरे यांचा जनसंवाद दौरा सुरु असल्याने ते आज सकाळी आपल्या घरातून दौऱ्यासाठी बाहेर पडले. यावेळी त्यांच्या या दौर्यात त्यांच्यासोबत तीन ते चार वाहनांचा ताफा होता. ही सर्व वाहने भरधाव वेगात निघाली होती. याच सुमारास बिदाल व दहिवडी दरम्यान असलेल्या शेरेवाडी येथील अनिकेत नितीन मगर (वय : २६ वर्षे) व रणजीत राजेंद्र मगर (वय : ३२ वर्षे) हे आपल्या दुचाकीवरुन बिदालकडे जाण्यास निघाले.
ही दुचाकी शेरेवाडीमधून बिदालला जाण्यासाठी रस्त्यावर आली असता आमदार गोरे यांच्या ताफ्यातील भरधाव वेगात आलेल्या काळ्या रंगाच्या स्कॉर्पिओने या दुचाकीला उडवले. हा अपघात एवढा भीषण होता की दुचाकीसह दुचाकीस्वार हवेत उडाले. यात दुचाकीचा चक्काचूर झाला तर दोघे दुचाकीस्वार गंभीर जखमी झाले. तसेच स्कॉर्पिओ रस्ता सोडून बाजूला गेली. यात स्कॉर्पिओचे सुध्दा मोठे नुकसान झाले. गंभीर दुचाकीस्वारांना तत्काळ दहिवडीतील ग्रामीण रुग्णालयात हलविण्यात आले. मात्र उपचारापूर्वीच दोघांचा दुर्दैवी मृत्यू झाला.