सातारा प्रतिनिधी । जिच्यावर जीवापाड प्रेम केलं, प्रसंगी पैशाची लाखो रुपयांची मदतही केली. मात्र, घेतलेले पैसे परत देण्याची जेव्हा वेळ आली तेव्हा त्याच प्रेयसीने प्रियकराचा जीव घेतला. जन्मदाती आई व साथीदाऱ्यांच्या मदतीने प्रियकराला बोलावून घेऊन त्याचा धारदार शस्त्राने खून केला आणि त्याचा मृतदेह कारसह तलावात फेकून दिल्याची धक्कादायक घटना सातारा जिल्ह्यातील माण तालुक्यातील नरवणे येथे घडली आहे.
योगेश सुरेश पवार (वय २८ रा. गोंदवले बु. ता. माण) असे खून झालेल्या युवकाचे आहे. या प्रकरणी योगेश पवार याचा मोठा भाऊ तेजस पवार याने दहिवडी पोलिसात तक्रार दिली असून प्रेयसी व तिच्या आईसह सात जणांविरोधात खुनाचा गुन्हा दाखल करण्यात आला. सात जणापैकी चारजण दहिवडी पोलिसांच्या ताब्यात असून तिघांचा तपास पोलीस घेत आहेत. याबाबत अधिक माहिती अशी की, योगेश पवार याचा भाऊ तेजस याने मंगळवार (दि. १८) संध्याकाळपासून भाऊ योगेश गायब झाल्याची तक्रार दहिवडी पोलिस ठाण्यात दिली.
योगेश पवार गायब झाल्याची पोलीस ठाण्यात नोंद झाल्यानंतर सहाय्यक पोलीस निरीक्षक दत्तात्रय दराडे यांच्या निरीक्षणाखाली योगेश पवार हा कुठे गायब झाला? याचा शोध घेण्यासाठी पथके तयार करण्यात आली. पोलिसांना सुरुवातीला काही धागेदोरे सापडत नव्हते. मात्र, पोलिसांनी तांत्रिक पद्धतीचा अवलंब केल्यानंतर तांत्रिक विश्लेषणाच्या आधारे योगेश सर्वात शेवटी माण तालुक्यातील नरवणे येथे गेल्याची माहिती मिळाली. त्यानुसार नरवणेमध्ये मिळालेल्या गोपनीय माहितीच्या आधारे योगेशचे नरवणेच्या माहेरवाशीनीसोबत प्रेमसंबंध असल्याची माहिती मिळाली.
पैसे परत मागितल्याने रोशनीने 18 मार्च रोजी योगेशला खून केल्यानंतर योगेश मृतदेह स्विफ्ट कारमध्ये टाकून फडतरी येथील कॅनॉलमध्ये फेकला. योगेशच्या भावाने तक्रार दिल्यानंतर पोलिस तपासात या प्रकरणाचा छडा लागला आहे. रोशनी, तिची आई पार्वती आणि दोन साथीदारांना अटक करण्यात आली असून उर्वरित आरोपींचा शोध सुरू आहे. या एकूण गुन्ह्याचा तपास वरिष्ठांच्या मार्गदर्शनाखाली सहायक पोलीस निरीक्षक दत्तात्रय दराडे करत आहेत.
खून करून काहीजण बारामती तर काही मुंबईत पोहचले
योगेश आणि रोशनीचे प्रेमसंबंध होते, आणि योगेशने तिला लाखो रुपये उसने दिले होते.पोलिसांनी संशयित माहेरवाशीनीच्या घरी जाऊन चौकशी केली असता ती तिथे आढळून आली नाही. त्यानंतर संशयित आरोपी बारामती आणि मुंबई येथे असल्याची गोपनीय माहिती पोलिसांना मिळाली. त्यापैकी प्रथमेश आणि अकील विश्वकर्मा या दोघांना बारामतीमधून तर नरवणे गावची माहेरवाशीन रोशनी माने (प्रेयसी) आणि तिची आई पार्वती माने या दोघींना मुंबईतून पोलिसांनी ताब्यात घेतले. चौघांकडे कसून चौकशी केल्यानंतर त्यांनी लोखंडी गजाने मारून योगेशची हत्या केल्याची कबुली दिली.
खून करून कारमधूनकॅनॉलमध्ये फेकला मृतदेह
योगेशचा खून केल्यानंतर त्याला स्विफ्ट गाडीमध्ये टाकून, गाडी लॉक करून गाडीसह नातेपुते परिसरात पाण्याच्या कॅनॉलमध्ये टाकून दिलं. त्यानंतर पोलिसांनी राबवलेल्या शोध मोहिमेनंतर सदर गाडी फडतरीला जाणाऱ्या रोडवरील कॅनॉलच्या ठिकाणी आढळून आली. त्यानंतर स्विफ्ट गाडी आणि योगेशचा मृतदेह क्रेनच्या साहाय्याने बाहेर काढण्यात आला. याबाबत नातेपुते पोलीस ठाण्यात आकस्मित मृत्यूची नोंद करण्यात आली.
