सातारा प्रतिनिधी । जागतिक मराठी अकादमी आणि रयत शिक्षण संस्था यांच्यावतीने सातारा येथे शुक्रवार, दि. 10 ते रविवार, दि. 12 कालावधीत ‘शोध मराठी मनाचा’ जागतिक संमेलन आयोजित करण्यात आले आहे. या संमेलनाचे उद्घाटन राष्ट्रवादी शरद पवार गटाचे अध्यक्ष शरद पवार यांच्या हस्ते होणार असल्याची माहिती जागतिक मराठी अकादमीचे अध्यक्ष रामदास फुटाणे आणि रयत शिक्षण संस्थेचे चेअरमन व संमेलनाचे स्वागताध्यक्ष चंद्रकांत दळवी यांनी नुकतीच पत्रकार परिषदेत दिली आहे.
यावेळी रामदास फुटाणे यांनी म्हटले की, या संमेलनात शुक्रवारी (दि. 10) दुपारी 1 वाजता सांस्कृतिक कार्यक्रम आणि दुपारी 2 वाजता ‘लक्ष्मीची पावले’ हा कार्यक्रम होणार आहे. यामध्ये हनुमंत गायकवाड व रामदास माने सहभागी होणार आहे, तर दुपारी 3 वाजता ‘समुद्रापलीकडे’ या कार्यक्रमात गणेश ठकार, प्राजक्ता वसई, अनिल नेरुळकर, प्रसाद वझे, सचिन जोशी व नेपोलियन शिंदे सहभागी होणार आहेत. संमेलनाचे उद्घाटन सायंकाळी 5 वाजता होणार आहे.
ज्येष्ठ साहित्यिक डॉ. आ. ह. साळुंखे हे संमेलनाचे अध्यक्ष आहेत. यावेळी सार्वजनिक बांधकाम मंत्री शिवेंद्रसिंहराजे भोसले व सांस्कृतिक कार्यमंत्री आशिष शेलार यांची प्रमुख उपस्थिती राहणार आहे. यावेळी जागतिक मराठी भूषण पुरस्कार हनुमंत गायकवाड आणि जागतिक मराठी गौरव पुरस्कार राजीव खांडेकर यांना देण्यात येणार आहे.
शनिवारी (दि. 11) सकाळी 9.30 वाजता ‘मुक्काम पोस्ट सातारा’ या कार्यक्रमात अभिनेते सयाजी शिंदे, किरण माने, संतोष पाटील सहभागी होणार आहेत. 11 वाजता ‘आकाशाशी जडले नाते’ या कार्यक्रमात अहिल्यानगरच्या नीलम इंगळे व अमेरिकेचे आमोद केळकर सहभागी होणार आहेत. दुपारी 12 वाजता ‘अभिजात मराठी आणि माध्यमे’ या विषयावर साहित्य संस्कृती मंडळाचे अध्यक्ष डॉ. सदानंद मोरे, नितीन ठाकरे (नाशिक), चंद्रकांत दळवी, जगन्नाथ पाटील (बंगळुरू) व मसापाचे कार्याध्यक्ष मिलिंद जोशी सहभागी होणार आहेत. 3 वाजता ‘आधारवड’ या कार्यक्रमात डॉ. भरत केळकर, डॉ. गिरीश कुलकर्णी व डॉ. विश्वास सापडणेकर सहभागी होणार आहेत. सायंकाळी 5.30 वाजता ‘चित्र शिल्पकार्य’ यामध्ये मंदार लोहार (सातारा), सचिन खरात (सोलापूर), कवी शिंदे, विठ्ठल वाघ, अशोक नायगावकर, नितीन देशमुख, मीनाक्षी पाटील, अंजली कुलकर्णी, वैशाली पतंगे, भूषण कुलकर्णी, प्रशांत शानबाग, योगेश नेर, समीर जिरांगलीकर हे सहभागी होणार आहेत. 7 वाजता सांस्कृतिक कार्यक्रम होणार आहे.
समारोपास खा, उदयनराजे अन् नागराज मंजुळे राहणार उपस्थित
रविवारी (दि. 12) सकाळी 9.30 वाजता ‘कृत्रिम बुद्धिमत्ता व सायबर सुरक्षा’ या विषयावर विवेक सावंत (पुणे), मंगेश आमले (मुंबई) व रवींद्रनाथ हिरोळीकर (पुणे) हे मार्गदर्शन करणार आहेत. 11 वाजता ‘रुपया. डॉलर व बिटकॉइन’ या विषयावर विद्याधर अनास्कर (पुणे), डॉ. नीरज हातेकर (वाई) व जयराज साळगावकर (मुंबई) हे मार्गदर्शन करणार आहेत. संमेलनाचा समारोप खासदार उदयनराजे भोसले व चित्रपट निर्माता, दिग्दर्शक नागराज मंजुळे यांच्या उपस्थितीत होणार आहे.
