सातारा प्रतिनिधी । सातारा जिल्ह्यासह संपूर्ण राज्याचे लक्ष हे आज फलटणमध्ये खासदार शरद पवार यांच्या होणाऱ्या जाहीर मेळाव्याकडे लागले आहे. या ठिकाणी अजित पवारांच्या राष्ट्रवादीतील आमदार दीपक चव्हाण आणि जिल्हाध्यक्ष संजीवराजे नाईक निंबाळकर (Sanjeevraje Naik Nimbalkar) यांच्यासह कार्यकर्ते हे शरद पवार गटात पक्ष प्रवेश करणार आहेत. हा पक्षप्रवेश कार्यक्रम थोड्याच वेळात कोळकी, फलटण येथे सुरु होणार असून या कार्यक्रमासाठी विधान परिषदेचे माजी सभापती रामराजे नाईक निंबाळकर (Ramraje Naik Nimbalkar) हे संजीवराजे नाईक निंबाळकर यांच्या घरी दाखल झाले आहेत.
फलटण येथील शरदचंद्र पवार गटात पक्ष प्रवेशाची वेळ ही दुपारी साडे तीन वाजता ठेवण्यात आली होती. मात्र, पक्ष प्रवेशाच्या कार्यक्रमास उशीर होताना दिसत असून या पक्ष प्रवेशावेळी सजीवावराजे नाईक निंबाळकर यांच्यासह अजित पवार गटाचे आमदार दीपक चव्हाण यांच्यासह इतर पदाधिकारी, कार्यकर्ते शरद पवार गटात प्रवेश करणार आहेत.
या पक्ष प्रवेशाच्या कार्यक्रमास खुद्द खासदार शरद पवार उपस्थित राहणार असून यावेळी रामराजे नाईक निंबाळकर हे देखील पक्ष प्रवेश करतील का याकडे सर्वांचे लक्ष लागून राहिले आहे. थोड्याच वेळात कार्यक्रमास सुरवात देखील होणार आहे.