सातारा प्रतिनिधी | अजिंक्यतारा-प्रतापगड साखर उद्योग समूहाच्या प्रतापगड सहकारी साखर कारखान्याकडे दि. १ ते १५ डिसेंबर २०२३ या कालावधीत गळीतास आलेल्या उसाला प्रतिटन ३ हजार रुपये प्रमाणे होणारी रक्कम ११ कोटी ३३ लाख ६२ हजार ३२ रुपये संबंधित शेतकऱ्यांच्या खात्यात जमा करण्यात आल्याची माहिती उद्योग समूहाचे मार्गदर्शक आमदार शिवेंद्रराजे भोसले यांनी दिली आहे.
अजिंक्यतारा-प्रतापगड साखर उद्योग समूहाच्या माध्यमातून जावली तालुक्यातील बंद अवस्थेत असलेला प्रतापगड कारखाना या हंगामापासून सुरु करण्यात आला आहे. दि. १ ते १५ डिसेंबर २०२३ या कालावधीत ३७७८७.३४४ मे. टन गाळप झाले. गाळप झालेल्या उसाच्या प्रतिटन ३००० रुपये प्रमाणे होणाऱ्या बिलाची रक्कम ११ कोटी ३३ लाख ६२ हजार ३२ रुपये संबंधित शेतकऱ्यांच्या बँक खात्यात आज वर्ग करण्यात आली आहे.
यापूर्वी म्हणजे दि. ५ नोव्हेंबर ते ३० नोव्हेंबर २०२३ या कालावधीत ५८७३६.६६१ मे. टन उसाचे गाळप झाले असून त्याचे १७ कोटी ६२ लाख ९ हजार ९८३ रुपये संबंधित शेतकऱ्यांना अदा अदा झाले आहेत. चालू गळीत हंगामात दि. ५ नोव्हेंबर २०२३ ते १४ जानेवारी २०२४ अखेर एकूण १७८८२६.०४९ मे. टन गाळप झाले आहे. प्रतापगड कारखान्याचा गळीत हंगाम सध्या जोमाने सुरू आहे.
