सातारा प्रतिनिधी । राज्याचे माजी कृषीमंत्री दिवंगत भाऊसाहेब फुंडकर (Bhausaheb Fundkar) यांच्या नावाने फलोत्पादन विभागाकडून भाऊसाहेब फुंडकर फळबाग लागवड योजना सुरु करण्यात आली आहे. राज्य पुरस्कृत भाऊसाहेब फुंडकर फळबाग लागवड योजना सन २०२४ – २५ कालावधी सातारा जिल्ह्यात राबविण्यात येत असून या योजनेतून शासनाच्या अनुदानाचा जिल्ह्यातील जास्तीत जास्त शेतकऱ्यांनी लाभ घ्यावा, असे आवाहन जिल्हा कृषी अधीक्षक भाग्यश्री फरांदे यांनी केले आहे.
या योजनेतंर्गत वैयक्तिक शेतकऱ्यांना लाभ घेता येईल संस्थात्मक लाभार्थ्यांना लाभ घेता येणार नाही. शेतकऱ्यांचा स्वतःच्या नावे सातबारा असणे आवश्यक आहे. जर सातबारा उताऱ्यावर लाभार्थी संयुक्त खातेदार असेल तर सर्व खातेदारांचे फळबाग लागवडीसाठी समंतीपत्र आवश्यक राहील. जमीन कुळ कायद्याखाली येत असल्यास सातबारा उताऱ्यावर जर कुळाचे नाव असेल तर योजना राबविण्यासाठी कुळाचे समंतीपत्र आवश्यक राहील.
या योजनेतून लाभ क्षेत्र मर्यादा किमान ०.२० हे. ते कमाल ६.०० हे. क्षेत्र इतकी आहे. कमाल क्षेत्र मर्यादेत लाभार्थी त्यांच्या इच्छेनुसार एका पेक्षा जास्त फळपिके लागवड करुन शकेल. महात्मा गांधी राष्ट्रीय ग्रामीण रोजगार हमी योजनेमध्ये पात्र असणाऱ्या शेतकऱ्यांनी दोन हेक्टर पर्यत लाभ घेतल्या नंतर उर्वरीत क्षेत्रांकरिता स्व. भाऊसाहेब फुंडकर फळबाग लागवड योजनेमधून कमाल क्षेत्र मर्यादपर्यंत लाभ घेता येईल. शेतकऱ्याने जमीन तयार करणे, माती व शेण खत / सेंद्रिय खत मिश्रणाने खड्डे भरणे, आतंर मशागत करणे, काटेरी झांडाचे कुंपण करणे, ही कामे स्वखर्चाने करावयची आहेत. तर खड्डे खोदणे, कलमे/रापे लागवड करणे, रासायनिक व सेंद्रिय खते देणे, पीक संरक्षण, नांग्या भरणे ही कामे १०० टक्के अनुदानित आहेत. अर्जदाराची नोंदणी व आधार प्रमाणीकरण करुन सर्व इच्छुक शेतकऱ्यांना महाडिबीटी पोर्टलवर जाऊन स्वतःची नोंदणी करावी लागेल.
तथापि ही प्रक्रिया शेतकऱ्यांना एकदाच करावी लागणार आहे. नोंदणी झाल्यानंतर (स्व.) भाऊसाहेब फुंडकर फळबाग लागवड योजना तसेच ठिबक सिंचन याबाबी करिता www.mahadbt.maharashtra.gov.in या संकेतस्थळावर वेगवेगळे अर्ज करावेत. महाडिबीटीवर प्राप्त झालेल्या अर्जामधून सर्वसाधारण, अनु. जाती, अनु. जमती, महिला व दिव्यांग यांची निवड लॉटरी पध्दतीने होईल. योजनेच्या अधिक माहितीसाठी मंडळ कृषी अधिकारी, तालुका कृषी अधिकारी, उपविभागीय कृषी अधिकारी या कार्यालयास संपर्क साधावा.
यावर्षी 1500 हेक्टर क्षेत्रात फळबाग लागवड करणार : भाग्यश्री फरांदे
राज्य शासनाच्या कृषी विभागामार्फत गट वर्षी राज्य पुरस्कृत भाऊसाहेब फुंडकर फळबाग लागवड योजना राबविण्यात येत आहे. या योजनेसह सर्व योजनांच्या लाभासाठी शेतकऱ्यांनी www.mahadbt.maharashtra.gov.in या वेबसाईटवर अर्ज करावा. त्याने अर्ज केल्यास 8 ते 15 दिवसात लॉटरी काढली जाते. ज्या शेतकऱ्याने अर्ज केला आहे त्याची लॉटरी निघाली की त्याचाच फॉर्म ओपन होतो. यावर्षी कृषी विभागाकडून भाऊसाहेब फुंडकर योजनेतून 1500 हेक्टर क्षेत्रात फळबाग लागवड करण्याचे उद्दिष्ट समोर ठेवण्यात आले आहे आणि ते कोणत्याही परिस्थितीत पूर्ण करणार असल्याची माहिती जिल्हा कृषी अधीक्षक भाग्यश्री फरांदे यांनी ‘हॅलो महाराष्ट्र’शी बोलताना दिली.