सातारा प्रतिनिधी । शिवसेना एकनाथ शिंदे गटाचे सातारा जिल्हाप्रमुख पुरुषोत्तम जाधव यांच्या नेतृत्वाखाली शिवसेनेच्या पदाधिकाऱ्यांनी थेट वर्षा बंगल्यावर जावून मुख्यमंत्री एकनाथ शिंदे यांची नुकतीच भेट घेतली. यावेळी लोकसभा निवडणुकीच्या अनुषंगाने शिवसेनेसाठी जिल्ह्यातील सकारात्मक वातावरण आणि पदाधिकारी व शिवसैनिकांनी केलेल्या निर्धाराबाबत सविस्तर चर्चा केली. ‘अभी नहीं तो कभी नहीं’च्या पदाधिकारी व कार्यकर्त्यांनी आग्रही भूमिका मांडली. यावेळी कार्यकर्त्यांच्या आग्रही भूमिकेचे मुख्यमंत्र्यांनी समर्थन करीत साताऱ्याची जागा आपण लढवू, असे सांगून या जागेसाठी आपण आग्रही राहणार असल्याचे स्पष्ट मत व्यक्त केले.
मुख्यमंत्र्यांच्या सातारा जिल्ह्यात खासदार शिवसेनेचाच होणार, पदाधिकारी आणि शिवसैनिकांच्या या आग्रही भूमिकेला जिल्ह्यातील जनतेकडून वाढता पाठिंबा मिळत असल्याने जिल्हा शिवसेनेत प्रचंड उत्साहाचे वातावरण आहे. दरम्यान, मुख्यमंत्री शिंदे यांची भेट घेत पुरुषोत्तम जाधव यांनी त्यांच्याशी अनेक महत्वाच्या विषयांवर चर्चा केली.
….तर जिल्ह्यात २०१४ मध्येच शिवसेनेचा भगवा फडकला असता
२००९ ची लोकसभा निवडणूक मी शिवसेना -भाजप युतीचा उमेदवार म्हणून लढलो. त्यावेळी मला दोन लाख ३४ हजार ५६ मते पडली. २०१४च्या लोकसभा निवडणुकीत शिवरायांचा गादीचा जिल्हा कोणतेही कारण नसताना मित्र पक्षाला सोडण्यात आला. त्यावेळी अन्यायाला वाचा फोडण्यासाठी मी सातारा लोकसभा निवडणूक अपक्ष लढलो. त्यावेळी मला एक लाख ५६ हजार मते पडली. त्यावेळी देशात मोदी लाट होती. परंतु त्या लाटेमध्येही मला भारत देशातील अपक्ष उमेदवारांमध्ये क्रमांक दोनची मते पडली आहेत. २०१४ मध्येच शिवसेनेचा भगवा फडकला असता. परंतु उद्धव ठाकरे यांनी मी तयारी करूनही माझ्यावर अन्याय केला असल्याचे पुरुषोत्तम जाधव यांनी मुख्यमंत्री शिंदे यांच्याशी झालेल्या भेटइवेळी संगितले.
सातारा जिल्ह्यात शिवदूत आणि बूथप्रमुखांच्या नेमणुका
२०१९ च्या पंचवार्षिक लोकसभेच्या निवडणुकीमध्ये भाजपामधून नरेंद्र पाटील शिवसेनेमध्ये येऊन धनुष्यबाण या चिन्हावर लढले होते. कारण हा मतदारसंघ शिवसेनेच्या वाट्याला आहे, म्हणून परंतु त्यावेळेच्या निवडणुका झाल्यानंतर खासदार उदयनराजे यांनी राजीनामा देऊन भाजपवासी झाले आणि पोटनिवडणुकीला त्यांना भाजपतर्फे लढले. त्यावेळी आम्ही सर्व शिवसैनिकांनी त्यांचे काम केले आहे. आता संपूर्ण सातारा जिल्ह्यात शिवदूत आणि बूथप्रमुखांच्या नेमणुका करण्यात आलेल्या असल्याचे जाधव यांनी भेटीवेळी सांगितले.
उद्याचा खासदार हा शिवसेनेचाच असेल…
सातारा जिल्ह्याच्या विकासासाठी तुम्ही हजारो कोटी रुपये निधी दिला आहे. त्यामुळे सातारा जिल्ह्यातील वातावरण शिवसेनेसाठी लाभदायक आहे. त्यात तुम्ही सातारा जिल्ह्याचे भूमिपुत्र आहात. त्यामुळे हा मतदारसंघ शिवसेनेच्यावतीने लढल्यास उद्याचा खासदार हा शिवसेनेचाच असेल. यामुळे भविष्यातील सर्वच निवडणुकांसाठी शिवसेनेला फायदा होणार हे स्पष्ट आहे. महायुतीमध्ये सातारा लोकसभा मतदारसंघ शिवसेनेच्यावतीने लढवण्यात यावा याबाबत सातारा जिल्ह्यातील शिवसेनेच्या पदाधिकाऱ्यांनी मुख्यमंत्री शिंदे यांच्यासोबत झालेल्या भेटीवेळी आग्रही भूमिका मांडली.