सातारा प्रतिनिधी | सातारा जिल्ह्यातील जावली तालुक्यात विकसित होत असलेल्या आंतरराष्ट्रीय दर्जाच्या पर्यटनस्थळाची मुख्यमंत्री एकनाथ शिंदे यांनी रविवारी कोयना जलाशयातून बोटीने प्रवास करत पाहणी केली. या पर्यटनस्थळामुळे जावली तालुक्यात स्कुबा डायव्हिंग, बनाना राईड, जेट स्की, हाऊस बोट, बोट क्लब यासह पर्यटकांसाठी अत्याधुनिक सुविधा उभारण्यात येत आहेत. जावळी तालुक्यातील मुनावळे येथे अत्याधुनिक व सर्व सोयींनी युक्त असे आंतरराष्ट्रीय दर्जाचे पर्यटनस्थळ विकसित करण्यात येत आहे. या माध्यमातून १०५ गावातील स्थानिकांना रोजगाराच्या मोठ्या संधी निर्माण होणार असल्याचे मुख्यमंत्री शिंदे यांनी सांगितले.
यावेळी जिल्हाधिकारी जितेंद्र डूडी, मुख्य कार्यकारी अधिकारी ज्ञानेश्वर खिलारी, पुरुषोत्तम जाधव यांच्यासह वरिष्ठ अधिकारी उपस्थित होते. यावेळी मुख्यमंत्री शिंदे यांनी मुनावळे येथे स्कुबा डायव्हिंग द्वारे मुनावळे येथे भेट दिली.
यावेळी मुख्यमंत्री शिंदे यांनी माध्यमांशी संवाद साधला. यावेळी मुख्यमंत्री शिंदे म्हणाले की, मुनावळे पर्यटनस्थळाचा स्थानिकांनी आर्थिक उन्नतीसाठी वापर करावा, हे पर्यटन स्थळ विकसित करताना स्थानिकांना त्यामध्ये सामावून घ्यावे. या परिसरात पर्यटनाच्या मोठ्या संधी आहेत. त्यामुळे कांदाटी खोऱ्यात आणखी पर्यटन प्रकल्प उभारण्यात येणार आहेत, त्यातून स्थानिकांना त्यांच्या घराजवळ रोजगार मिळणार आहे. याचा फायदा स्थानिक व येणाऱ्या पर्यटकांनाही होणार असल्याचे मुख्यमंत्री श्री.शिंदे यांनी सांगितले.
मुख्यमंत्री शिंदेंनी कोयना जलाशयातून केला बोटीतून प्रवास; जावळीतील पर्यटनस्थळाच्या उभारणीबाबत केलं महत्वाचं विधान pic.twitter.com/rAZ7wBiLkM
— Hello Maharashtra (@HelloMaharashtr) November 6, 2023
मुनावळे येथे स्कुबा डायव्हिंग, बनाना राईड, जेट स्की, हाऊस बोट, बोट क्लब यासह पर्यटकांसाठी अत्याधुनिक सुविधा उभारण्यात येत आहेत. हे सर्व करताना सुरक्षेचा संपूर्ण विचार करण्यात आला आहे. निरीक्षण मनोरा, पर्यटकांसाठी चेंजिंग रूम आदी सोयीदेखील याठिकाणी करण्यात येणार आहेत, असेही मुख्यमंत्र्यांनी सांगितले.
अधिकाऱ्यांना दिल्या महत्वाच्या सूचना
मासेमारीसाठी स्थानिकांना परवानगी देण्यात यावी, जलाशयामध्ये मत्स्यबीज सोडावे. अतिरिक्त भू संपादन झालेल्या जमिनींचा प्रश्न जिल्हाधिकारी यांनी विशेष शिबिर घेऊन मार्गी लावावा, अशा सूचना मुख्यमंत्री श्री. शिंदे यांनी यावेळी अधिकाऱ्यांना दिल्या. यावेळी जिल्हाधिकारी श्री. डुडी यांनी प्रकल्पाची सविस्तर माहिती दिली.
हेलिकॉप्टरमधून देखील केली पाहणी
दरम्यान, मुख्यमंत्री एकनाथ शिंदे यांनी हेलिकॉप्टरमधून देखील जावळी परीसरातील वासोटा किल्ला, नागेश्वर मंदिर, अहिरे पुल, बामणोली परिसराची हवाई पाहणी केली. यावेळी अधिकाऱ्यांशी चर्चा करून या ठिकाणच्या पर्यटन स्थळाच्या उभारणीबाबत चर्चा केली.