शिष्यवृत्तीचे अर्ज भरण्यास महाविद्यालयांना ‘या’ तारखेपर्यंत मुदत; ‘समाज कल्याण’च्या सहायक आयुक्तांकडून महत्वाची माहिती

सातारा प्रतिनिधी । शिष्यवृत्ती व व्यावसायिक पाठ्यक्रमास शिक्षण घेणाऱ्या विद्यार्थ्यांना वसतिगृह निर्वाह भत्ता या योजनेचे अनु. जाती प्रवर्गातील महाडीबीटी पोर्टलवर अर्ज नुतनीकरण व नवीन अर्ज नोंदणी सुरूवात करण्यात आलेली आहे. याबाबत जिल्ह्यातील सर्व महाविद्यालयास संकेतस्थळाव्दारे तसेच समाज कल्याण विभागामार्फत मागासवर्गीय पात्र विद्यार्थ्यांचे सदर संकेतस्थळावरुन अर्ज भरणे आवश्यक आहे. याबाबत विद्यार्थ्यांना अर्ज भरण्याची संधी उपलब्ध व्हावी या उद्देशाने दि.15 जून पर्यंत मुदत देण्यात आली आहे, महाविद्यालयांनी प्रलंबित शिष्यवृत्तीचे अर्ज वेळेत भरावेत, असे आवाहन समाज कल्याणचे सहायक आयुक्त नितीन उबाळे यांनी केले आहे.

याबाबत नितीन उबाळे यांनी म्हंटले की, मागासवर्गीय विद्याथ्यांनी ऑनलाईन भरलेले अर्ज महाविद्यालयांचे स्तरावर मोठ्या प्रमाणात प्रलंबित असल्याचे निदर्शनास येत आहे. सन 2023-2024 हे शैक्षणिक वर्ष संपलेले आहे. तरी देखील महाविद्यालय / महाविद्यालय प्रशासनाकडून मागासवर्गीय विद्यार्थ्यांचे अर्ज महाविद्यालय स्तरावर प्रलंबित आहेत ही बाब गंभीर स्वरुपाची आहे.

जिल्ह्यातील सर्व महाविद्यालयांना दि.14 जून 2024 पुर्वी महाविद्यालयामध्ये प्रवेशित असणाऱ्या पात्र मागासवर्गीय विद्यार्थ्यांचे अर्ज ऑनलाईन माध्यमातून पडताळणी करुन विद्यार्थ्यांचे अर्ज सहायक आयुक्त, समाज कल्याण यांच्याकडे मंजुरीसाठी वर्ग करावेत.

…तर महाविद्यालयावर कारवाई होणार

महाविद्यालय/ महाविद्यालय प्रशासनाकडून कार्यवाही न झाल्यास, पात्र मागासवर्गीय विद्यार्थी शिष्यवृत्ती योजनेच्या लाभापासून वंचित राहिल्यास संबंधीत महाविद्यालय व महाविद्यालय प्रशासन यांना जबाबदार धरण्यात येईल. प्रचलित शासन निर्णयानुसार व अनुसूचित जाती, अनुसूचित जमाती (अत्याचार प्रतिबंधक) अधिनियम 1989 (सुधारित नियम 2015 नुसार) गुन्हे दाखल करण्यात येईल, असा इशारा समाज कल्याणचे सहायक आयुक्त श्री. उबाळे यांनी दिला आहे.