सातारा प्रतिनिधी | सातारा शहरात आज शनिवारी एक मोठी दुर्घटना घडली. शहरातील मोळाचा ओढा चौकात असलेल्या एका भंगाराच्या दुकानाला पहाटे दोन वाजण्याच्या सुमारास भीषण आग लागली. या आगीमध्ये भंगाराच्या दुकान पूर्णपणे जळून खाक झाले आहे. या दुर्घटनेत सुमारे दहा ते बारा लाख रुपयांचे नुकसान झाल्याचा अंदाज वर्तवला जात आहे.
याबाबत घटनास्थळावरून मिळाली माहिती अशी की, शनिवारी दीड ते पहाटे दोन वाजण्याच्या सुमारास सातारा शहरातील मोलाचा ओढा परिसरात असलेल्या ‘सचिन स्क्रॅप सेंटर’ भंगाराच्या दुकानाला अचानक आग लागली. आग लागली तेव्हा दुकानात मोठ्या प्रमाणात प्लॅस्टिक, टायर आणि इतर ज्वलनशील साहित्य होते. या साहित्यामुळे आगीने अधिक रौद्ररूप धारण केले. आगीचे आणि धुराचे प्रचंड लोट मोठ्या प्रमाणात बाहेर पडू लागल्याने परिसरातील नागरिकांनी तातडीने दुकानाकडे धाव घेतली. तसेच पाण्याच्या साह्याने आग विझवण्यासाठी शर्थीचे प्रयत्न सुरू केले
घटनास्थळी उपस्थित असलेल्या काही नागरिकांनी आगीच्या घटनेची माहिती सातारा नगरपालिकेच्या अग्निशमन दलास दिली. माहिती मिळताच काही वेळेत अग्निशमन दलाचे जवान बंबासह घटनास्थळी दाखल झाले. सुमारे तीन ते चार तासांच्या अथक प्रयत्नांनंतर अग्निशमन दलाच्या जवानांना आगीवर नियंत्रण मिळवले. मात्र, तोपर्यंत दुकानातील सर्व साहित्य जळून नष्ट झाले होते. भंगाराच्या दुकानास आग लागण्यामागचे कारण अद्याप समजू शकलेले नसून पोलीस याप्रकरणी अधिक तपास करत आहेत.
