सातारा प्रतिनिधी । महाराष्ट्रातील शेतकऱ्यांना कर्जाचा लाभ देण्यासाठी एक महत्वपूर्ण निर्णय घेण्यात आला आहे. सार्वजनिक बांधकाममंत्री शिवेंद्रसिंहराजे भोसले यांच्या मागणीनंतर महसूलमंत्री चंद्रशेखर बावनकुळे यांनी भोगवटा वर्ग २ च्या जमिनीवर बँकांना कर्जाचा बोजा आकारण्याची मुभा दिली आहे. यामुळे शेतकऱ्यांना कर्ज मिळणे सोपे होणार आहे.
मंत्रालयात झालेल्या एका महत्वपूर्ण बैठकीत हा निर्णय घेण्यात आला. या बैठकीला सार्वजनिक बांधकाममंत्री शिवेंद्रसिंहराजे भोसले, मदत व पुनर्वसनमंत्री मकरंद पाटील, सातारा जिल्हा मध्यवर्ती सहकारी बँकेचे चेअरमन नितीन पाटील आणि अनेक वरिष्ठ अधिकारी उपस्थित होते. महसूलमंत्री बावनकुळे यांनी सांगितले की, शेतकऱ्यांच्या हितासाठी जिल्हा बँका कर्जपुरवठा करतात, मात्र कर्ज परतफेड न झाल्यास बँकांना अडचणी येतात. आता वर्ग २ च्या जमिनीवर बोजा चढविता येईल, ज्यामुळे शेतकऱ्यांना कर्ज मिळणे सोपे होईल.
देवस्थान इनाम जमिनीबाबतही कमिटी नेमण्यात आली असून, त्यांच्या अहवालानंतर निर्णय घेतला जाईल. पुनर्वसनाच्या शिक्क्यांबाबतही लवकरच निर्णय घेण्यात येईल, असे मदत व पुनर्वसनमंत्री मकरंद पाटील यांनी सांगितले. बँकेचे मुख्य कार्यकारी अधिकारी राजेंद्र सरकाळे यांनी बोजा चढविताना येणाऱ्या अडचणींबाबत महसूलमंत्री चंद्रशेखर बावनकुळे यांनी माहिती दिली.
