कराड प्रतिनिधी । कराड तालुक्यातील घोगाव येथील बाळसिद्धनाथ देवाची यात्रा २७ व २८ फेब्रुवारी रोजी पार पडली. या यात्रेत दोन ठिकाणी झालेल्या मारामारीत दोन जण जखमी झाले आहेत. याप्रकरणी ९ जणांविरोधात कराड तालुका पोलिसांत गुन्हा दाखल करण्यात आला आहे.
याबाबत अधिक माहिती अशी की, प्रकाश रामचंद्र सूर्यवंशी यांनी फिर्याद दिली आहे. त्यानुसार गुरूवारी रात्री साडेअकरा वाजण्याच्या सुमारास सूर्यवंशी भावकीची मानाची सासनकाठी हनुमान मंदिराच्या पाठीमागे नाचवत होते. त्याचवेळी समोर साळुंखे भावकीतील लोक त्यांची सासनकाठी नाचवत होते. त्यावेळी संदीप साळुंखे, सुनील साळुंखे व प्रतीक साळुंखे यांनी नाचत असताना प्रकाश सूर्यवंशी यांना धक्का मारला.
यावेळी प्रकाश सूर्यवंशी यांनी तुम्हाला नीट नाचता येत नाही का? तुम्ही मला धक्का का मारला?, अशी विचारणा केली. त्यावेळी प्रतीक साळुंखे याने तुझी लय नाटके झाली म्हणत शिवीगाळ व दमदाटी केली. तसेच संदीप साळुंखे, प्रतीक साळुंखे, सुनील साळुंखे, संतोष साळुंखे, नीलेश साळुंखे, प्रथमेश भेदाटे, मंगेश साळुंखे यांनी संगनमत करून प्रकाश सूर्यवंशी यांना शिवीगाळ, दमदाटी करून हाताने व लाथा बुक्क्यांनी मारहाण केली. यावेळी प्रकाश सूर्यवंशी यांची चेन गहाळ झाली आहे.
तर प्रदुम्न कृष्णदेव साळुंखे यांनी दिलेल्या फिर्यादीनुसार, २८ रोजी पहाटे साडेचार वाजता यात्रा संपल्यानंतर ते बळसिद्ध मंदिरासमोर उभे राहिले असताना गावातीलच प्रथमेश भेदाटे हा काही कारण नसताना प्रदुम्न साळुंखे यांच्याकडे पाहून शिव्या देऊ लागला. यावर साळुंखे यांनी तू मला शिव्या का देतो? असे विचारले असता दोघांत शाब्दीक वाद झाला.
यावेळी तिथे उभा असलेल्या सुमित जालिंदर शेवाळे याने साळुंखे यांना शिवीगाळ, दमदाटी करीत लाकडी दांडके व दगडाने मारहाण केली. यात प्रदुम्न साळुंखे जखमी झाले असून त्यांच्यावर रूग्णालयात उपचार सुरू आहेत. याप्रकरणी प्रथमेश भेदाटे व जालिंदर शेवाळे यांच्या विरोधात गुन्हा दाखल करण्यात आला आहे.
