सातारा प्रतिनिधी | किन्हई (ता. कोरेगाव) येथील एका 65 वर्षीय वृद्ध महिला डॉक्टरला तुमच्या विरोधात मुंबईमध्ये विविध गुन्हे दाखल आहेत. सर्वोच्च न्यायालयाने तुमच्या अटकेचे आदेश दिले आहेत. मात्र, आम्ही तुमच्या वयाचा विचार करून ‘डिजिटल अरेस्ट’ करत आहोत, असे म्हणून ऑनलाईन तब्बल 70 लाख 92 हजार 993 रुपयांची फसवणूक केल्याची धक्कादायक घटना समोर आली आहे.
याबाबत अधिक माहिती अशी की, संबंधित डॉक्टर महिलेस दि.4 डिसेंबर 2024 रोजी सकाळी 11च्या सुमारास अज्ञात व्यक्तीने मोबाईलवरून कॉल केला. मी पोलिस इन्स्पेक्टर हेम्पत्ती कलश, टिळकनगर पोलिस ठाण्यातून बोलत आहे, असे सांगितले. तुमचा एक मोबाईल नंबर मुंबई येथे अ‍ॅक्टिव्ह असून, त्यावरून लोकांना अश्लील मेसेज जात आहेत. तुमच्या विरोधात 18 तक्रारी दाखल झाल्या आहेत. हा मोबाईल क्रमांक व तुमचे आधार कार्ड क्रमांक अजून कुठे लिंक आहे, हे तपासतो आणि पुन्हा एक तासाने कॉल करतो, असे सांगितले.
त्याच दिवशी परत एक तासाने संबंधित व्यक्तीने फोन करून सांगितले की, मनी लाँड्रिंग केसमध्ये तुमचे आधार कार्ड वापरले गेले आहे. त्यामुळे सर्वोच्च न्यायालयाने तुम्हाला अटक करण्याचे आदेश दिले आहेत. मात्र, आम्ही तुमच्या वयाचा विचार करून ऑनलाईन डिजिटल अरेस्ट करत आहोत, असे सांगून भीती दाखवली. या बदल्यात ठराविक बँक खात्यावर रक्कम पाठवण्यास सांगितले. त्या अज्ञाताने सांगितल्याप्रमाणे संबंधित डॉक्टर महिलेने वेगवेगळ्या बँक खात्यांवर ‘आरटीजीएस’द्वारे 70 लाख 92 हजार 993 रुपये पाठवले. त्यानंतर फोन येणे बंद झाले व अधिक चौकशी केली असता फसवणूक झाल्याचे लक्षात आले. यानंतर संबंधित डॉक्टर महिलेच्या फिर्यादीवरून कोरेगाव पोलिस ठाण्यात गुन्हा दाखल करण्यात आला आहे.
