सातारा प्रतिनिधी । “एक प्रेमळ कुटुंब प्रत्येक बालकांसाठी हा उद्देशच खुप विशिष्ठ व उल्लेखनीय आहे. बालगृहामध्ये काळजी व संरक्षणासाठी दाखल असलेल्या बालकांना बालगृहामध्येच कुटुंबाचे वातावरण निर्माण व्हावे यासाठी जिल्हा महिला व बाल विकास अधिकारी कार्यालय, सातारा व मिरॅकल फाऊंडेशन, इंडीया हे एकत्रिपणे काम करीत आहे,” असे प्रतिपादन जिल्हा विधी सेवा प्राधिकरण सचिव श्रीमती एन. एन. बेदरकर यांनी केले.
जिल्हा महिला व बाल विकास अधिकारी कार्यालय, सातारा व मिरॅकल फाऊंडेशन, इंडीया यांच्या संयुक्त विद्यमाने एक प्रेमळ कुटुंब प्रत्येक बालकांसाठी” या उपक्रमांतर्गत एक दिवशीय प्रशिक्षण कार्यशाळा हॉटेल ग्रीन फिल्ड, सातारा येथे उत्साहात पार पडली. या एक दिवसीय कार्यशाळेचे उद्घाटन जिल्हा विधी सेवा प्राधिकरण सचिव श्रीमती एन.एन. बेदरकर यांच्या हस्ते झाले. यावेळी महिला व बाल विकास अधिकारी विजय तावरे, मिरॅकल फाऊंडेशनचे प्रोग्रॅम मॅनेजर श्री.संकेत शेगावकर, बाल कल्याण समिती सदस्या शीतल लोखंडे यांच्यासह महिला व बाल विकास अधिकारी कार्यालयातील अधिकारी, कर्मचारी उपस्थित होते.
प्रशिक्षणामध्ये संपुर्ण दिवस बालकांचे सामाजिक तपासणी अहवाल, केस मॅनेजमेंट, बालकांचे कुटुंबआधारीत पर्यायी संगोपन, कुटुंबाचे सक्षमीकरण या विषयांवर उपस्थित तालुकास्तरावरील अधिकारी/कर्मचारी यांना देण्यात येणार आहे. सदर प्रशिक्षणामुळे तालुकास्तरावरील अधिकारी, कर्मचारी यांना प्रत्यक्ष काम करताना अत्यंत महत्वाची मदत होणार आहे. त्यामुळे काळजी व संरक्षणाची गरज असलेल्या बालकांबाबत हिताचे निर्णय घेणे व त्यांचे पुर्नवसन करणेसाठी बाल कल्याण समितीस सोपे जाणार आहे. काळजी व संरक्षणाची गरज असलेल्या बालक वंचित राहणार नाही, असे महिला व बाल विकास अधिकारी श्री. तावरे यांनी यावेळी सांगितले. या कार्यक्रमाचे प्रास्ताविक प्रभारी जिल्हा बाल संरक्षण अधिकारी श्रीमती सुजाता देशमुख यांनी केली. तसेच सुत्रसंचालन संरक्षण अधिकारी श्री.अजय सपकाळ यांनी केले.
