सातारा प्रतिनिधी । सातारा जिल्ह्यातील महाबळेश्वर येथील दुर्गादेवी विसर्जन मिरवणुकीत रात्री जनरेटरजवळील पेट्रोलच्या कॅनमधील पेट्रोल गळतीमुळे आग लागण्याची घटना घडली होती. यावेळी आगीत सहा वर्षांची अलिना सादिक नदाफ ही गंभीररित्या भाजली होती. गेल्या दोन महिन्यांपासून सूर्या सह्याद्री रुग्णालयात ती मृत्यूशी झुंज देत होती. अखेर शनिवारी तिची झुंज अपयशी ठरली.
याबाबत अधिक माहिती अशी की, महाबळेश्वर येथील कोळी आळीमधील दुर्गादेवी मंडळाच्या देवीची मूर्ती विसर्जनाची मिरवणूक निघाली होती. मिरवणुकीतील ट्रॅक्टरवर जनरेटरसाठी पेट्रोलचा कॅन ठेवण्यात आला होता. जनरेटरमधून निघालेल्या कार्बनमुळे पेट्रोलचा कॅन वितळला. त्यामुळे आतील पेट्रोलने पेट घेतला. त्यामुळे ट्रॅक्टरवर मोठा भडका उडाला. यावेळी लागलेल्या आगीमध्ये तीन ते चार वर्षांच्या सात मुली, तर त्यांना वाचविण्याच्या प्रयत्नात असलेले दोन युवक असे नऊ जण भाजले होते.
या आगीत शामगाव, ता. कराड येथील मुळची चार वर्षांची ओवी पवन पोळ आणि महाबळेश्वरमधील सहा वर्षांची अलिना सादिक नदाफ या चिमुकल्या सर्वात जास्त भाजल्या गेल्या. या मुलींसोबत आणखी दोन मुले देखील प्रथम महाबळेश्वर येथील ग्रामीण रुग्णालय नंतर सातारा येथे आणि त्याच रात्री अधिकच्या उपचारासाठी पुणे येथील सूर्या सह्याद्री रुग्णालयात भरती करण्यात आले होते. चार मुलांपैकी शिवांश संजय ओंबळे याला रुग्णालयामधून उपचारानंतर सोडून दिले.
मात्र, तिघांवर तेथे उपचार सुरू असताना नोव्हेंबर महिन्यामध्ये ओवी पवन पोळ हिचा उपचारांदरम्यान मृत्यू झाला होता. तर सध्या सूर्या सह्याद्री या रुग्णालयात अलिना सादिक नदाफ (६) आणि समर्थ सनी सपकाळ (७) दोघांवर उपचार सुरू होते. यामधील अलिना सादिक नदाफ ही चिमुरडीदेखील अधिक भाजल्याने तिची प्रकृती चिंताजनक झाली होती. तब्बल दीड महिन्यांहून अधिक काळ तिच्यावर उपचार सुरू होते. रुग्णालयातील डॉक्टरांनी देखील प्रयत्नांची पराकाष्टा केली. परंतु अलीनाची मृत्यूशी झुंज अपयशी ठरली.